الدكتور بهي الدين مرسي يكتب الصوم والكلى ومريض السكر
- دكتور.. أنا عندي السكر، أصوم؟
- لأ.. وهقولك ليه.
- بس انا السكر مظبوط وأرقامه كويسة صايم وفاطر وتراكمي.
- برضو لأ.. وهقولك ليه.
- يا دكتور أنا شاب وصحتي زي الفل وقاعد في رمضان في البيت لا خروج ولا عطش.
- برضو لأ.. وهقولك ليه.
- يا دكتور معنديش أي أمراض ولا ضغط ولا باخد أدوية سيولة.
- برضو لأ.. وهقولك ليه.
- يا دكتور انا مش بعطش، ولا بجوع، وتحليل السكر صايم وفاطر زي الفل.
- برضو لأ.. وهقولك ليه.
- يا دكتور تحليل الكرياتينين Creatinine عندي طبيعي.
- برضو لأ.. وهقولك ليه.
- يا دكتور انا سنى 30 سنة، يعني شباب.
- برضو لأ.. وهقولك ليه.
- يا دكتور أنا بنت ومش متجوزة ولا حامل.
- برضو لأ.. وهقولك ليه.
تعال نفهم...
- مفيش مريض سكر في الكون بعد مضي 7- 10 سنوات من بدء الإصابة كليته بتعمل بكفاءة ما قبل الاصابة بالسكر، وعلى أفضل الأحوال يا مريض السكر كفاءة الكليتين عندك أقل من 80% حتى مع اعتدال نسبة السكر، وقد تقل عن 60% في بعض الحالات.
- الكرياتينين ليس هو المؤشر الوحيد لسلامة الكلى، هذا التحليل مؤشر "لإحدى" الوظائف وهي قدرة الكلية على استخلاص الكرياتينين من الدم، ولكن للكلى نحو 12 وظيفة اخري لا يكشفها مستوى الكرياتينين.
- مرض السكر عبارة عن خلل في التمثيل الغذائي - وللأسف - حتى لو اكتشفت السكر تاني يوم من إصابتك به، وهذا مستحيل لأنه لا يبدأ فجأة، وظل مستوى السكر منتظما كل ساعة وكل يوم فلا بد وان تصاب ببعض مضاعفات المرض وهي تراكمية عبر السنوات.
- مشكلة مرض السكر ليست في ارتفاع نسبة السكر ولا انخفاضه ولا انتظامه. المشكلة هي اضطراب وظيفة الانسولين ذلك الهرمون المسؤول عن دخول السكر للخليه يعنى ممكن يكون السكر في الدم مرتفع 300 مجم% والخلايا جعانه سكر !!
- اضطراب وظيفة الأنسولين هي أحد أمرين، إما أن إفرازه معطل (قليل أو منعدم) كما هو النوع الأول من السكر، او انه موجود وبكمية طبيعية ولكن استقباله لدي الخلايا معطل لاسباب عدة كما هو النوع الثاني.
- مش عايز انكد عليك واقولك ان لخبطة السكر بتستدعي هرمون الأدرينالين اللى بيعمل "ضوضاء وشغب" في كل وظائف الجسم: ضربات قلب ولا كأنك طالع سلم، ارتفاع ضغط ولا كأنك بتتخانق، حرق سعرات وتشنج عضلي ولا كأنك في المعتقل، يقظة واضطراب نوم ولا كأنك في مغارة، تحفيز كل غدد الجسم بلا داعي وكأنك في حالة حرب.
- في كل هذه المتاعب، تتحمل الكلي العبء الاكبر من اضطراب مستوى السكر، فهناك وظيفة الخلاص من السكر المرتفع بالدم (غالبا اعلى من 180مجم%) لتخفيض الاذى وضبط الضغط الازموزي للدم بعدما اصبح قوامه ثقيلا ويوشك ان يتجلط وذلك بافراز هذا "العسل" في البول، ولكن تحتاج الكلي الى كميات هائلة من الماء لتصرف السكر عبر البول.
وخلّي بالك: الكلي "قمّاصة" قوي وبتزعل بسرعة، وممكن ترمي مفاتيح الشغل وتقدم استقالتها (فشل كلوي) من حاجتين:
1 اي حد يسد سكتها ويعطل سريان البول في سكته من الكلى مرورا بالحالب، والمثانة ومجرى البول النهائي سواء حصوة، ورم، أو حبس ارادي يسبب ضغطا عكسيا ( Hydronephrosis/ Back pressure).
2- نقص تركيز الماء لساعات طويلة في مرضى السكر ( مش في الأصحاء - الاصحاء يصوموا بمنتهى اليسر) لأن البول هنا وسيلة تخلص من السكر الزائد اللى مأمورة تتخلص منه. - انتبه: وحتى مع فرضية ضبط مستوى السكر عند رقم مثالي بالعلاج، تظل هناك مشكلة خلل توازن السوائل بالخلايا (التوازن الاسموزي وتركيز الدم) قائمة. وللعلم أي محاولة لتجرع كميات هائلة من الماء في فترة وجيزة (اكثر من 2 لتر في خلال ساعة مثلا) قد تحدث "التسمم بالماء"وهو مصطلح غريب عليك ولكن الطب يفهمه، وتفسيره ان جسمك يحتوى 5 ليتر سوائل داخل الأوعية الدموية ومعه تركيز البوتاسيوم مستقر عند 3.6 - 5 مللي مول، ولكن عندما تشرب ليصبح حجم الدورة الدموية 7- 8 لتر يتخفف تركيز البوتاسيوم الى رقم قد يوقف عضلة القلب (Dilutional hypokalaemia).
بص.. من الآخر يا مريض السكر
أنت ممكن تصوم وفاكر نفسك صح، بس كليتك بتدفع التمن حتى لو شربت بئر زمزم قبل الفجر، لأن الناس متعرفش إن الكلية محدش يقدر يضحك عليها، ومهما شربت كمية ماء في السحور وزي ما بتعمل قبل أدان الفجر وأنت عمّال تشرب وتشرب.. الكلية مطالبة بتثبيت تركيز الماء في الجسم عند رقم معين، وكل الماء اللي حضرتك شربته قبل أدان الفجر لازم ينزل في خلال ساعة، وهنا يتساوى اللي شرب برميل ماء مع اللي اتسحر ونسي يشرب.
يا أخي، راجع طبيبك المعالج لمزيد من التحري ولكن لا تزايد على رب العزة. هو بيقولك خد الرخصة وافطر وصيامك معتمد، تقوم حضرتك لأنك اكرم منه (استغفر الله) تقول له شكرا يارب مش عايز منحتك !!
